昨天美股不夠聽話，沒有大跌，那今早港股沒有平匯豐執了，無咁開心，但我仍會直入。
昨晚美科技股稍稍穩下來，但不見有甚麼起色，只是Telsa有點升勢，升3%。看！市場已經開始轉主題，「人工智能用例」才是王道，科企盲鬥算力已沒意思，要有應用，Telsa要出人形機械人，是一種用例，所以有點追捧。當然，這種追捧會穩一穩AI晶片股，但已成為次要焦點。
不要問我這會否帶動港股的人形機械人股，不知道，我不想研究，咁「概念」既股票，我唔敢沾手。坦白說，我對人形機械人咁立體的AI應用，仍非常有保留，起碼未來兩年唔會先進得去邊，只會停留喺「郁動得好似真人咁」，但要呢D 人形機械人做到真服務，有排啦！所以，呢D股，一炒高，我接貨肯定就走唔切，咪搞我！
科技亦有佢既自然發展規律，不受人為意志所轉移，唔係Elon Musk想做就做到，由汽車發展到電動車，用了幾十年光景，而家想一下子跳到人形機械人，妙想天開；不過，Telsa底厚，可以未到資金斷鏈前，以呢個「用例」唯心地將股價炒高到能夠散貨，但其他企業做人型機械人就未必得啦！
你歡喜可以炒下Tesla，但我同呢隻股無緣，佢幾有炒勢我都無乜興趣入手。
人工智能晶片的應用，我認為未來兩年始終仲係停喺「平面」，生圖生文字生程式生分析等等，但已經夠做，你估要人工智能生出有「商用」價值的「平面」用例容易咩！大家諗諗，如果我D個人投資心路文，係由AI 生既，你真係連指尖按幾下過嚟我呢個網站睇文都懶做！
所以，即使人工智能點勁都好，都必須先有普及的「平面」用例後，才到「立體」用例，而呢個過程，起碼要三四年。
因人形機械人「主題」而炒高股價，絕對有可能，因為Elon Musk太多後代，要同公司分多D錢飼養，但人形機械人「本身」，仲未有可能！
有可能既仍然係相對較平面的應用，而這大用，我認為均在銀行板塊。
已不斷有人問我除了匯豐，還心儀那些銀行股，這方面，我心路已有新感覺，一會再另文分享。
（補白：小紅書粉絲請留意，為免太多是非，我將兩個小紅書帳號的私訊功能關掉了，但仍可於各帖子下留言或作評語，事無不可公開談嘛！）
