由信和牽頭的錦上路地鐵站盤「柏瓏」，近兩週錄得99個撻訂單位，佔全盤1,520伙的6.5%，發展商當下該仍有約一成的貨尾未走。
撻訂數目看似觸目，但其實也不太難理解，這樓盤在香港樓市史上最高期間，即2022年上半年開賣，均價約在$19000，今日這個價錢已可買到啓德新盤，若會德豐將軍澳區地鐵盤14000蚊元呎都賣得辛苦，柏瓏二手最多也是13000，跌幅已是三成有多，採用建築付款的買家，除所支付的一成已化為烏有外，更要基於銀行新估價再抬錢上會，資金不足被迫要撻釘，絕不稀奇。
買樓用建築期付款不是新事物，幾十年來發展商都有提供呢種付款方法，但我認為買家的心態就顯見不同。以前，很多買家採用這種付款方法，極保守（當然而家都有買家咁保守），是因為發展商開賣時，手上頭寸不夠比即供，但肯定未來一段日子有足夠現金回籠，才挑這付款計劃，而現金一到手，他們大多都匆匆「找數」，免節外生枝。
但隨著一代一代人的過去，對建築期付款的演繹就不同，膽子亦大，特別在樓市當旺時，地產代理會跟你說：「比一成，睇兩年半，到時樓價再升，又賺左！」我會好奇，這些地產代理有無進一步補充：「但如果樓價大跌，銀行估價不足，你就要再抬錢補差價。」佢地可能有講，但基於促銷，好快會再補白，認真地轉移視線：「但而家樓市大方向都係升，好難跌既。」再加上2022年開始疫情後通關，理據十足！
於是，很多買家就相信，特別年青一代，手上根本資金不足，但本著明天會更好，就衝動地去馬，引致今天損失慘重，是死膽！是好漢！
最麻煩的是，今天你撻訂，發展商是否一定不追差價呢？我極有保留。若果樓市不像以前般「剛好地」絕處逢生，而像日本經濟般有十年以上的拖垮下去，港樓價在未來仍持續下調，那發展商這保留的追收權利，未必不行使，甚至可成新常態。
買樓，好時就好，衰時可以幾衰都得；但只可惜，港樓這麼多年，好時勢佔主流，大家置業都掉以輕心。然而，一旦處於史上長期之低迷時，真係再衰既事情都會出現，衰到你唔信！
