自從港府全面在樓市撤辣後，網上就有些人教短炒二手樓，我一直認為，這種炒賣極高風險，而且坐艇極高，博唔過。
近日有兩單馬鞍山二手盤的交易，一賺一蝕，正正點出當中的關鍵！
「馬鞍山迎海·星灣一個兩房單位，近日以608萬元成交，呎價11,625元，原業主為四名地產代理，持貨不足半年，帳面勁賺108萬元，扣除稅項及相關使費，每名業主約分得約21萬元。」
「馬鞍山嵐岸一個三房單位近日以785萬元成交，呎價10,481元，原業主於今年初以900萬元購入，持貨僅半年，最終帳面虧損115萬元，若計及稅項及相關使費，實際蝕讓約165萬元。」
同區樓盤，一賺一蝕，相信大家亦看到當中的分別，大家真不要相信炒樓要考眼光這些鬼話，考乜鬼吖！亦無乜野需要比錢上堂學習，你係行內人，本身係地產代理，知訂得嚟又有第一手物業放售資料，咪贏咯！
我之前都寫過，如果你想短炒住宅物業，必須要同d地產代理混得好熟，熟既意思當然要比著數人，賺時要分一舊比佢（呢種操作嗰代理當然係個體戶經營，唔係大行既員工，否則有貪污凟職之嫌），唔係人地點會介紹荀盤比你，有都自己或親人食，若樓價高哽唔起，咪好似上面第一個個案咁搵人夾咯，一人一份，清清楚楚，律師樓交易，呢種合作最軍真！好易成事！
所以，地產代理比得你既盤，必定係市價盤，若有低價荀盤，一係就自己食，唔係都搵d熟客買，呢d專業客日後賺左都會「自動」分一份比嗰代理，唔係嗰代理做乜益佢！
好似已故的波叔，一定已經有一班好交心的地產經紀幫佢做野，有錢齊齊搵，成個「集團」咁，唔係入貨出貨點可以咁頻密！所以，我絕對相信波叔應該係一個非常吃得開的人，但係咪吃得開到成為「水魚」，見仁見智，而且往往成敗論英雄，你炒得到咪叫人際關係八面玲瓏，炒燶咪係「儍仔」，比人埋身搵笨咯！
呢個世界，乜野都係人既遊戲！操作技巧是次要，尤其係炒樓。
