如果你閒時有行開先達廣場，近一段日子，摺既舖多左，基本上，做二手機賣買既最好日子已過，手機新型號已不像十多年前般充滿新意，在當下了無新點子下，大家換新機的意欲不強，一機用幾年，做二手機的舖頭turnover 極低，根本圍唔到皮費，無得做！我見有幾間店名唔同其實都係同一個老細既「連鎖店」，都摺剩一兩間，你就知道幾難做。
嗰處稍稍仲有得撈下既係做蘋果手機水貨，但好唔好做呢？因為今時今日iPhone 已經無炒值，只能做個量；不過，有量都已經好好，至少可以做到貨如輪轉，高turnover 算係保住有得撈，始終呢類生意要有好大額既現金轉流，利息成本唔低，無返咁上下收入真係頂唔住。
好多人仲以為先達d iPhone水貨既主要買家，仲係來自內地，其實已經唔係，客路已經好廣，來自世界各地，我見不時有唔同國家既人（唔只俄國人啦）去先達到大量取貨；畢竟，香港既iPhone 唔似內地型號般被閹割左d功能，又唔係行eSIM，有一定優勢，較受外國人歡迎，所以好多外國買手都嚟香港取貨。而家就算新機有得炒，炒風唔只來自內地（已經弱左好多），歐亞其他地區反而是動力源頭。
尋晚特朗普又嚟料，打算對蘋果非本土製手機開徵25%關稅，佢真係強人所難，要蘋果一時三刻喺美國本土開設廠房，談何容易！咁當然有得傾，美國政府而家發窮惡，要錢！我相信蘋果肯「貢獻」，應該傾得掂數。
但點都好，環球重商主義重現，即要加強保護自身國內企業，在關稅重重下，反而令環球水貨市場有拓大的空間，當然，而家做水貨好難大賺，始終並非源於環球大好市，加上人人都可以做，無壟斷，點可以有得大賺呢！但起碼叫做有得做。
你睇日本都想取消外國旅客的免稅制度就知一二，目的就係想杜絕水貨客，日本政府心想，與其比水貨客賺免稅呢個差額，不如自己政府賺返！
所以，先達d做水貨店舖，遲d可能又多一批來自美國既買手，為貨如輪轉增添一股新動力。
