暑假啦，好多家長都會帶自己小朋友去檢查眼睛，檢查完發現佢地有近視，點算好呀？
第一，唔好一黎就鬧爆小朋友，雖然環境因素，如多近距離工作會容易近視，但遺傳都有影響，如果家長都有近視，小朋友患近視的機會會多70%。
第二，唔好抗拒戴眼鏡，都市傳言話眼鏡越戴越深。中文大學十多年前的研究，有近視唔戴足度數，反而令小朋友加深得越快。同埋，唔好同視光師或眼科醫生拗或者講數可唔可以戴少d，清晰的視力對小朋友的學習都好d啦。
第三，如果可以的話，盡早做近視控制措施，因為可以有效減慢近視加深達50%或以上，大大減少因深近視而患致盲眼疾的風險。
咁近視控制，到底有咩方法呢？
免費野先，鼓勵小朋友多做戶外活動，每日最少30分鐘，可有效減慢近視加深。至於近距離工作，不論係睇書做功課，定打機玩電話，最好遵守20-20-20守則，即每20分鐘近距離工作，就要望20呎外的事物20秒。
到光學，市場上都有幾款有效控制近視的眼鏡片，可減慢近增長達50-60%，這些眼鏡片，透過特別光學設計，提供清晰視力之餘，亦在視網膜邊做成近視離焦效果，牽制眼球拉長。除了眼鏡外，市場亦有軟性隱形眼鏡可做到近視控制效果，大部分都係每日即棄，衛生乾淨容易打理。當然，俗稱ok鏡，晚上配戴的角膜矯形透氧硬性隱形眼鏡，亦可有效控制隱形眼鏡。
藥物啦，亞托品眼藥水可以有效減慢近視加深，濃度會影響控制效果，濃度越高，控制效果越好，但會令瞳孔放大，使用者畏光。除此之外，亞托品眼藥水亦會令用者失去看近的調節能力。所以，眼科醫生會提供較低濃度的亞托品眼藥水，用以控制近視之餘，亦不會令瞳孔放得太大及喪失太多調節能力。
咁如果三者一齊做，會唔會控制效果再強d架？會，不過只係短期，一年內會加強控制效果，之後就分別不大。
